Amacahu

Tamacahut tesselmad imeẓyanen d imeqqranen. Asnulfu ines d abrid ger iberdan i tefren tmetti i uselmed n tudert-is amek i tt-tedder, s uzamul. Aṭas i s-yennan timucuha i uzuzen kan iwumi i tent-ttawin. Sganent imeẓyanen, sedhuyent imeqqranen. Tamuɣli-a tezleg, imi tamacahut ugar i tessakway i tesgan. Imi deg-s imedyaten n tlufa n tudert, imedyaten n twaɣiyin d wussan iberkanen, yezmer umdan ad yezgel ma yecfa ɣef tifrat d yiberdan issufuɣen i s-d-temla tmacahut. Temmal-aɣ-d daɣen amek yezmer ad yidir umdan di tmetti yebḍan d iderma, i deg igellil d win ur nli irgazen neɣ tigellilt d tameṭṭut yeqquren, d tijjert.